Binte zahra ka khula sar hai khuda khair kare
aur har haath may pathar hai khuda khair kare

hur ke bete pe hi shabbir bahot roye thay
ab to laashe ali akbar hai khuda khair kare
binte zahra ka…

maarte hai wahan naizon ko zameen par zaalim
dafn jis ja ali asghar hai khuda khair kare
binte zahra ka

kuch qadam door khadi dekh rahi hai zainab
shimr ke haath may khanjar hai khuda khair kare
binte zahra ka

chaunk kar khaab se kehti thi watan may sughra
kaisi mushkil may mera ghar hai khuda khair kare
binte zahra ka

peeche deewar hai aur jalta hua dar aagay
beech may binte payambar hai khuda khair kare
binte zahra ka

be-rida jaana hai zainab ko wahan par ke jahan
har koi dushman e haider hai khuda khair kare
binte zahra ka

hai chadi haath may zaalim ke labon par hai hasi
tasht may sheh ka rakha sar hai khuda khair kare
binte zahra ka

mir sajjad ye shirin ne kaha rote huwe
kiski naize pe ye chadar hai khuda khair kare
binte zahra ka