Qabr Asghar Ki Banane Mein Bohat Dair Lagi

Sheh Ko Ik Chand Chupaney Mein Bohat Dair Lagi

Kuch Qadam Door Hai Bazar Se Darbar Magar

Phir Bhi Shehzadi Ko Aane Mein Bohat Dair Lagi

Sheh Ne Har Lash Ko Jaldi Se Uthaya Lekin

Lash Akbar Ki Uthane Mein Bohat Dair Lagi

Tukray Chuntay Hoye Qasim Ke Kaha Maula Ne

Haye Afsoos Ke Aane Mein Bohat Dair Lagi

Iss Qadar Pyas Se Sokha Tha Guluye Sarwar

Shimar Ko Taig Chalaney Mein Bohat Dair Lagi

Baap Ki Lash Se Durron Ki Aziyat De Kar

Aik Bachi Ko Hatanay Mein Bohat Dair Lagi

Chand Satrein Thin Magar Lash-e-Ali Akbar Par

Sheh Ko Khat Parh Ke Sunanay Mein Bohat Dair Lagi

Karbala Pohancha TAKALLUM: Tu Yehi Ro Ke Kaha

Mujh Ko Sarkar Bulanay Mein Bohat Dair Lagi