Baat Aayegi Parde Ki To Yaad Aayegi Zainab
tareekhe gham-o-dard ko dohrayegi zainab

uth-ti jo nahi laashe jawan dijiye awaaz
paala hai to laasha bhi utha laayegi zainab
baat aayegi….

kis kis ko sambhalegi kise degi tasalli
jalte hue qaimo se kise laayegi zainab
baat aayegi….

sar nange jise dekh ke suraj bhi na nikla
ab sar khule balwe may wohi jaayegi zainab
baat aayegi….

machlegi jo sonay ke liye raat ko bachi
kya deke tasalli usay behlayegi zainab
baat aayegi….

chadar hi ka de deti kafan cheenli wo bhi
ab bhai ko kis tarha se dafnayegi zainab
baat aayegi….

pursay ko anees aayenge aur poochenge ehwaal
kis kis ko nishan durro ke dikhlayegi zainab
baat aayegi….